थारु भाषाके सामाचार
सुनिल चौधरी
झुम्का,माघ ७ । थारु महिलासब जागरुक हेते हरयारहल थारु संस्कार जगेर्नाकेलेल जुटल् छै । थारु महिला उत्थान समाज आ थारु महिला सभा संगठ तिला संक्राईत पावैनके अवसरमे बिबिध कार्यक्रम कैरके बृहत बनाईने छै । थारु महिला आपनमे नेतृत्व बिकास कर्ते झुम्कामे सैनदिन तिला संक्राईत तथा माघि महोत्सव समापन कर्ने छै । थारु समुदाय संस्कृतिमे धन्गर छै कहैत ७ दिनके माघी महोत्सवमे प्रदर्शन करैत पुष ३० गते सुरु भ्याके माघ ६ गते तक बोहौत संस्कृति झल्कैबला कार्यक्रम कैरके महोत्सव समापन करल्कै । भेषभुषा संस्कृति झल्काईते झाँकी प्रदर्शन,भाषा बिकासकेलेल बत्तृmत्वकला प्रतियोगीता,थारुभाषा नृत्य प्रतियोगीता,रामधुनी आईडल,थारु मौलिक परिकार आ हर्यारहल संस्कारसबके प्रदर्शन कर्ते थारु महिला उत्थान समाज रामधनी संस्थासे अयोजित तिला संक्राईत तथा दोसर माघी महोत्सव २०७४ भब्यरुपमे सम्पन्न करल्कै ।
तैहनङ्ग सुनसरीमे थारु महिला सभा जिल्ला सुनसरीके सहकार्यमे महिला सभा ईटहरी नगर समितिसे दुईदिन माघी महोत्सव ईटहरीमे अयोजना करल्गेलै । ईटहरी उपमहानगरपालीकमे थारुके पौहनका प्राथमीक्ता लगायत थारु पहिचान जोगावैकेलेल राज्यसे निति,नियम,बजेट निर्धारणके शन्देस दैकेलेल महोत्सव अयोजना करल्के महिला सभा जिल्ला अध्यक्ष सुसिला चौधरी जानकारी देल्क । महोतसव नगर अध्यक्ष सुसिला लेखिके अध्यक्षतामे पर्यटन राज्य मन्त्रि सुमित्रा बिश्वास उद्धघाटन करलकै । महिला सभा ईकाइ बराह नगरपालीका धनपुरीसे थारु भाषाके गीतमे नृत्य प्रतियोगीता अयोजनाकैरके सफल करल्गेलै ।
रामधुनीके झुम्काके जितमहान चौकमे थारु महिला उत्थान समाजसे अयोजित महोत्सव कार्यक्रममे सुरुके दिन बौहोत गाम टोलके क्लव,टोलबिकास,बोर्डिङ्ग स्कुल,थारु संगठन,संघ संस्थाके झाँकी प्रर्दशन करैत प्रदेश नं. १ सुनसरी क्षेत्र नं. २ के प्रतिनिधि सभाके नव निर्वाचित सदस्य सिताराम मेहता उद्धघाटन करलकै त समापनमे मुलमे जवानमे महिला नेतृ रामधुनी नगरपालिका नगर उप प्रमुख सबिना चौधरी शोभा बढाईलकै । थारु महिला उत्थान समाजके अयोजनामे भ्याल से महोत्सवमे राष्ट्रिय कलाकार दिपाश्री निरौला आ गायक प्रवलदिप बिश्वास बिषेश आकर्षणके साथ प्रस्तुत रहल्गेलै । स्थानिय कलाकारमे थारु गायक आ लोक गायीकाके प्रस्तुती रहल्गेलै । थारु गायक मिठगर स्वरके धनगर प्रकास माझि,देव कृष्ण चौधरी,रिता चौधरीके बिशेष कैरके प्रस्तुती रहगेलै । स्टल सबमे सबादलैके खातिर राखल् थारु परिकार घोगी,पेरवाके मासु,भक्काके बिशेष कारोवार भ्याल्के संस्थाके कोषाध्यक्ष तथा कार्यक्रम संयोजक आशा चौधरी जानकारी देल्क । महोत्सवके सातदिनमे थारु परिकारके पुर्वाञ्चल भैर पहिचान कराइत तिलासंक्राईत पावैनके महत्वके बारेमे शन्देश दैकेलेल थारु महिला उत्थानके बरका भुमिका रहल्छै कैहके समापनमे याल कार्यक्रमके मेजवान सब बतैलकै । कार्यक्रममे थारु कल्याण कारी सभाके पुर्व केन्द्रिय अध्यक्ष चन्द्रकरमार चौधरी,केन्द्रिय पार्षद केहिलाल चौधरी,रामधुनी वडा नम्बर १ के वडा अध्यक्ष महेश चौधरी,पत्रकार लक्की चौधरी महोत्सव आयोजना कैरके थारु संस्कृति झल्काईतै सफल करलके उपलक्ष्यमे उत्थान समाजके शुभकामना तथा धन्यवाद देल्कै ।
महोत्सवमे कला अनुरुप स्टलमे राखल् थारु भेषभुषामे बन्याल मुर्तिके आकर्षक रहलगेलै । थारु पुरुषके कोदाईर बोकल् आ महिला मोटा बोकल् प्रतिमुर्तिमे अवलोकनकर्ता बौहोत झन् फोटो सेशन करलकै । मुर्ति संगे फोटो खिचाके सामाजिक सञ्जाल फेबुक सबमे बौहोत स्थान पावलकै । उटा मुर्ति ईनरुवा ५ बलहाके दिपनारायण चौधरी बनाईने छै । तैहनङ्ग थारु समुदायमे बिवाह हैकेलेल मरुवाके महत्वपुर्ण भुमिका रहै छै । से मरुवा महोत्सवमे आकर्षकके रुपमे रहलै । बिवाहके बिधब्यवहार मरुवामे कन्यादान, दिपधानसे आर्शिवाद दैके लगायतके कार्य है छै । मरुवा बनाईकेलेल ईटहरी झोरापटाके कलाकार पशुपति चौधरीके भुमिका रहल छै । स्टलमे खरखरीया सेहो राखल छेलै । खरखरीया थारु समुदायके बिवाहमे कन्याके आनैकेलेल बर पक्षसे लजाई छै , नोकनैत सब खरखरियाके अरियातैकेलेल संग संगे आबै छै । लेकिन अख्ने थारु समुदायके बिवाहमे खरखरीयाके प्रयोग नै देखल जाई छै । बिवाहैमे बाजागाजा बजाईकेलेल चमखुलिया ढोलके सेहो महोत्सवके उद्धघाटनके दिन प्रदर्शन करल्गेलछै । बिवाहमे यहो ढोल पिपहि छोइरके डिजे आ बैण्डबाजा प्रयोगमे याल छै ।
संस्कार संस्कृतिके प्रदर्शन कर्ते रामधुनीके पहिचान,पर्यटन बिकास,एकता सदभावके कायम करैले सफल थारु महिलासबके पहलमे महोत्सव समपन्न भेल्से ईलाका प्रहरी पकलीके प्हरी निरिक्षक अम्बरबहादुर निरौला थारु महिला उत्थानके धन्यवाद देल्कै । कार्यक्रममे प्रत्येक दिन ५ हजार अवलोकन कर्ताके सहभागीता रहल्के अयोजक समिति दावि कर्ने छै । उत्थान समाज सिता चौधरीके अध्यक्षतामे गठनके दिनसे थारु संस्कृति जर्गेना,परपावैन महत्वके शन्देस दैकेलेल बिबिध कार्यक्रम सब अयोजना करैत याल् छै । उत्थान समाजमे महिला नेतृ उपाध्यक्षमे बिमला चौधरी,सचिवमे रन्जिता चौधरी, सदस्य सनम चौधरी चन्द्रकला चौधरी, यसोदा चौधरी,हिरा चौधरी,बिमला चौधरी,नागीन चौधरी,मिरा चौधरी,उर्मिला चौधरी लगायतके समाजसेवि महिला रामकुमारी चौधरीके आबद्धता रहल छै । थारु भाषा बिकासके कार्यक्रम आयोजना करैत सभब्य रुपमे महोत्सव सम्पन्न करलके थारु पत्रकार संघ शाखा सुनसरी,आदिवासी जनजाती पत्रकार महाँ संघ शाखा सुनसरी उत्थान समाज कार्य समितिके धन्यवाद ब्यक्त करल्कै ।

तपाईको प्रतिक्रिया

रामधुनी आईडलको यस शनिबार श्रावण ३१ गतेको फाइनल राउण्डमा कला चाम्लिङ् राई विजेता Download Listen
कार्यक्रम मेरो अभिव्यक्ति, प्रत्येक शनिबार दिउँसो २ बजेदेखी ३ बजे सम्म Download Listen
कार्यक्रम के म तिम्रो साथी बन्न सक्छु Download Listen
Ramdhuni Samachar of 3 pm Download Listen
“मेरो अभिव्यक्ति” एपिसोड-३ नबिन, खगेन्द्र सुब्बा जी को साथ Download Listen
“मेरो अभिव्यक्ति” एपिसोड-२ नबिन, बिष्णु चौधरी जी को साथ Download Listen
“मेरो अभिव्यक्ति” एपिसोड-१ हेमन्त/नबिन दिनेश जी को साथ Download Listen
All-station-ID-radio-amdhuni-91.9-mhz-final-by-aashif-tharu.mp3 Download Listen
sabda sangeet final by aashif tharu falgun 15 Download Listen